Vonbrigði

Það voru mikil vonbrigði að hlusta á ræðu Steingríms J. Sigfússonar, þessi gamli baráttujaxl var bitur og sló til allra átta. Ég átti von á kjarnmikilli stjórnarandstöðuræðu en því miður voru lítil sem engin málefni í þessari ræðu, hún var frekar einkasamtal hans við umheiminn, vonbrigði hans og hverju þau voru um að kenna þ.e. öllum öðrum en honum sjálfum.

Katrín Jakobsdóttir aftur á móti hélt einstaklega góða stjórnarandstöðuræðu, hún var málefnaleg, kímin, gagnrýnin og markviss. Varaformaður VG er greinilega afar efnilegur þingmaður sem verður mjög spennandi að fylgjast með að störfum. Hún mun áreiðanlega veita ríkisstjórninni aðhald með sínum beinskeyttu en jafnframt kímnu ræðum.

Guðríður Lilja hélt ágætis ræðu líka en Katrín bar af mönnum VG í dag. Virkilega gaman að sjá því Steingrímur hefur ríkt yfir flokknum sem talsmaður og ræðumaður. Við erum greinilega að sjá breytingar á forystuliði þess flokks og þar munu konur greinilega ráða miklu.

Steingrímur J. Sigfússon: Samfylkingin gafst upp

Stykkishólmur - hvað er að?

Hvernig getur það staðist að þegar greitt er fyrir börn einungis fyrir hráefni máltíðar eins og í Stykkishólmi þá sé það dýrara heldur en dýrasta máltíðin þar sem hluti kostnaðar og hráefni er innifalið í verðinu einnig ef nemendur greiða allan kostnað???

Verð hráefnisins í Stykkishólmi er algerlega út úr kortinu eða 417 krónur á máltíð einungis fyrir hráefni en næstu skólar þar fyrir neðan eru skólarnir í Fellabæ og á Egilsstöðum með 340 krónur sem er jafnmikið verð fyrir hráefnið og dýrustu skólarnir þar sem nemendur greiða allan kostnað.

Þurfa sveitarfélögin á þessum stöðum ekki að skoða málið?

Tveir grunnskólar bjóða nemendum ókeypis máltíðir

Er ekki allt bara búið?

Ég óttast nú að hann Gísli minn fái varla bröndu þegar búið er að moka svona upp úr ánni rétt áður en hann fer að veiða. Hann fer aðra helgi og var ég búin að hugsa gott til glóðarinnar að fá marga af hans gómsætu silungsréttum en nú setur að mér ugg við lestur þessarar fréttar.

Hvað er eiginlega pláss fyrir marga fiska í ánni?

Um 200 urriðar í fyrsta hollinu í Mývatnssveit

Dugnaðarforkur

Það er heilmikið afrek að ganga yfir Grænlandsjökul og skemmtilegt að fylgjast með á blogginu hennar Mörtu. Það er gaman þegar fólk setur kraft í lífið og finnur sér ævintýri og lætur þau rætast, ekki er síðra þegar gott málefni nýtur þess í leiðinni.

Ég tek undir það með Mörtu að það er gríðarlega mikilvægt að fara í brjóstaskoðun og það geri ég reglulega en mikið er það annars vont og væri snilld ef fundin væri upp þægilegri aðferð til þess. Nú er bara að hvetja vísindamenn til að finna upp sársaukaminni aðferð og þá er ég viss um að konur væru enn duglegri að fara.

Búin að ganga yfir þriðjung Grænlandsjökuls

Er þetta ekki ólöglegt???

Samkvæmt forsetabréfi um orðuna segir:

Við andlát þess er orðunni hefur verið sæmdur skulu aðstandendur eða skiptastjóri skila henni aftur til orðuritara. Í útlöndum má fá sendiráðum og ræðismönnum orðurnar til frekari fyrirgreiðslu.

En það stendur svosem hvergi að það megi ekki selja hana, svo það er spurning hvað fólk gerir þegar harðnar á dalnum. Nú greinir menn á um hversu mikilvægt eða merkilegt er að fá þessar orður en þegar fólk þiggur það á annaðborð þá er eðlilegt að það beri virðingu fyrir þeim en sleppi því annars að þiggja þær.

Líklega þarf að gera nýtt forsetabréf þar sem þetta er nákvæmar.

Fálkaorður boðnar til sölu á eBay

Ótrúlegt

Það er ótrúlegt að vita af snjóflóði upp í Hlíðarfjalli þegar maður situr á sama tíma hér niður í bæ á Akureyri og myndar blómin í garðinum. En þetta segir manni öðru fremur að aðstæður geta verið talsvert misjafnar á láglendi og hálendi. Náttúran lýtur sínum eigin lögmálum og við mannverurnar getum ekki mikið annað en lært að þekkja hana og takast á við afleiðingarnar þegar hún sýnir sínar erfiðu hliðar.

Sjö manns lentu í snjóflóðinu í Hlíðarfjalli

Draumastaða

Ég er búin að vera með Kristjáni L. Möller á fundi eftir fundi þar sem hann ræðir ævinlega samgöngumál þannig að ég veit að hann hefur gríðarlegan áhuga á málaflokknum og því er þetta draumastaða fyrir hann og reyndar okkur öll í kjördæminu sem þekkjum hans vinnu vel og vitum að þar eru verkin mörg. Hinsvegar eru verkefnin gríðarleg um land allt og ég veit að þeim mun Kristján sinna vel. Í samstarfssamningnum er áhersla á stórátak í samgöngumálum og því greinilegt að það á að leggja áherslu á málaflokkinn sem verður gaman að sjá hvernig tekst til.

Ekki síður verður spennandi að sjá hvernig Kristján fer með fjarskiptamálin sem verða umfangsmikill hluti þar sem samstarfssamningurinn leggur áherslu á störf án staðsetningar og eflingu tenginga í dreifbýli.

Það er mikill munur að Samfylkingin sé nú komin í ríkisstjórn því það verður að viðurkennast að stjórnarandstöðuhlutverkið er lýjandi;-)

Kristján: Fékk draumastarfið

Fín mynd hjá Þórhalli

Gaman að fá mynd af sér á kjörstað, sérstaklega í ljósi þess að ég kaus alveg rétt;-)

Þokkaleg kjörsókn í Norðaustur-, Norðvestur- og Suðurkjördæmi

Ótrúlegur götulistamaður

 

Áður en maður getur farið að kjósa þá fer maður að gera ýmislegt sér til dundurs og þar á meðal fann ég þennan flotta götulistamann Julian Beever sem kallar sig Pavement Picasso. Ótrúleg þrívíddarmyndverk hjá honum sem má sjá hér í Birmingham hér sýnist mér heimasíðan hans

 

Takk fyrir frábæra kosningabaráttu

Ég vil nota tækifærið nú þegar kosningabaráttunni er að ljúka og kosningarnar taka við að þakka öllum þeim sem hafa verið með í baráttunni. Þetta hefur verið einstaklega skemmtilegur tími, við höfum lært margt og vináttubönd hafa styrkst.

Hlakka til að sjá úrslitin á morgun og vonandi sjáum við nýja farsæla ríkisstjórn í kjölfarið!