Geiri Humm Humm

Aldrei hef ég kynnst annarri eins ákvarðanafælni hjá nokkrum forsætisráðherra og Geir Haarde. Það er alveg ómögulegt að komast áfram með verkstjóra sem ekki tekur af skarið og hefur ekki frumkvæði.

Er það nema von að Ingibjörg Sólrún hafi lagt til nýjan verkstjóra. Frekar en viðurkenna að Jóhanna Sigurðardóttir er öflugri verkstjóri skilar Geir umboði sínu með þá von að geta leitt þjóðstjórn.

Það eru fróðlegir tímar framundan.

 

Geir og Ólafur á löngum fundi

Kröftugur formaður

Það kom mér ánægjulega á óvart hversu öflug ræða Ingibjargar Sólrúnar Gísladóttur var á fundinum svo skömmu eftir komuna heim. Hún var með sterka sýn á hvert skal halda og markmið. Undir hennar stjórn treysti ég Samfylkingunni fyrir landsstjórninni þar til kosningar fara fram. Það er gríðarlegur styrkur í að hafa formann eins og hana og vonandi styrkist heilsa hennar hratt því handtökin eru mörg framundan.

Kreppan er ekkert að fara og slagorð og upphrópanir hjálpa okkur ekki, það þarf að vinna sig úr þessu ástandi. Hver svo sem mun stjórna landinu á erfitt verk fyrir höndum eftir kosningar.

Meiri biðlund á landsbyggðinni

Lýðræði

Nú eru kosningar innan skamms og flokkar bjóða sig fram, áreiðanlega fleiri en síðast og þau nýju pólitísku öfl sem hafa verið að myndast í mótmælastöðum munu áreiðanlega vera reiðubúin til verka við endurreisn landsins. Ótrúleg eljusemi og dugnaður þeirra við að koma fram skoðunum sínum nýtist vel á Alþingi og hlakka ég til að sjá þau takast á við verkefnin.

Ég er hinsvegar ekki sannfærð um að þriggja mánaða stjórn sé ákjósanlegur kostur, val á fólki í þá stjórn þyrfti að fara fram af hálfu þeirra sem fólk kaus á þing og falið vald í því fólgið sem ekki er skýrt. Lýðræðið er grundvallarstoð samfélagsins og hana ber að virða þó menn séu ekki alltaf sáttir við niðurstöðuna þá er frelsi til að bjóða sig fram og kjósa það sem gerir það að verkum að ólík sjónarmið og hugmyndafræði hafa jafna möguleika.

Fylgi VG mælist rúmlega 32%

Miskunnarleysi

Engir hagsmunir virðast ofar í huga Harðar Torfasonar en hans eigin, þvílík vonbrigði að sjá miskunnarleysi forsvarsmanns mótmælanda svo skýr. Hann hefur sífellt hvatt til harðari aðgerða sem leitt hafa til skemmdarverka og ofbeldis þó svo að hann hafi látið sem hann hafi ekkert með það að gera efast maður eftir að hafa lesið þessi orð. Er afsökunarbeiðni nóg?

Hænuskref í rétta átt

Reykjavíkurkjördæmin hafa talað, hvað segja önnur kjördæmi?

Nú hefur Samfylkingarfélag Reykjavíkur lýst sinni skoðun hvað varðar kosningar. Sú skoðun snertir væntanlega Reykjavíkurkjördæmi suður og norður. Eftir eru hin kjördæmin fjögur. Samfylkingarþingmenn úr Reykjavíkurkjördæmunum eru átta og þá eru eftir kjördæmi sem eiga 10 þingmenn á þingi.

Væntanlega munu önnur kjördæmi halda fundi í kjölfar þessarar ályktunar og fara yfir stöðuna um hvort þau eru sammála flokksmönnum úr Reykjavíkurkjördæmunum. Það er þó eilítið flóknara að halda fundi þar, þar sem flokksmenn í Norðausturkjördæmi eru staðsettir frá Djúpavogi til Siglufjarðar, í Norðvesturkjördæmi frá Akranesi til Sauðárkróks að Vestfjörðum meðtöldum og þá síðast Suðurkjördæmi sem nær frá Höfn í Hornafirði til Suðurnesja.

Fróðlegt verður að sjá hvernig formenn kjördæmisráða Samfylkingarinnar í öðrum kjördæmum munu halda fundi í kjölfarið eða hvort höfuðborgin verður látin ein um að hafa skoðanir á þessu máli.

Samþykktu ályktun um stjórnarslit

Við söknum þín!

Þó erfitt sé fyrir okkur Samfylkingarmenn að fylgjast með veikindum formannsins okkar þá er það töluvert erfiðara fyrir hana og fjölskyldu hennar. Við söknum hennar svo sannarlega í því pólitíska starfi sem við þurfum nú að vinna. Í breyttu samfélagi þarf að setja ný stefnumið en Ingibjörg Sólrún leiddi einmitt gríðarlega öflugt stefnumótunarstarf Samfylkingarinnar um allt land. Vonandi kemur hún til starfa sem fyrst.

Ingibjörg Sólrún væntanleg heim í vikulok

Íslendingar biðja sænska þingið að lána ekki landinu

Ég var að fá bréf sem merkt var áríðandi frá "Byltingu fíflanna" á Akureyri þar sem Íslendingar eru hvattir til að senda sænska þinginu bréf til að mótmæla því að Íslandi séu lánaðir peningar þar segir:

We Icelanders are proud of our close friendship with Sweden, therefore I feel it my duty to inform the Swedish congress that lending money to the current government of Iceland is like giving a wolf a sheep i.e. he will eat it without sharing anything. In the current situation if I where able to lend to the Icelandic government I would not do so. There is absolutely no guarantee that the money will be put to any good.

Er þetta almenn skoðun fólks?

Stefnumótun niðursveiflu

Ég hef tekið þátt í stefnumótun míns flokks bæði í landsmálum og málefnum sveitarstjórna. Nú þegar við blasir að skera niður og breyta rekstri gífurlega við skert fjárráð á báðum stjórnsýslustigum þá er flókið að velja hvað ætti að skera niður og hvar ætti að sækja fram. Stefnumótunin var fyrst og fremst miðuð við vöxt og uppbyggingu, þ.e. bæta við þjónustu við fólk og fyrirtæki en fjallaði ekki um hvaða þjónustu ætti að hætta að veita.

Flest heimili í landinu hafa farið nákvæmlega yfir útgjöld og ákveðið hvar er skorið niður, hvað menn ætla að hætta að gera o.s.frv. Sama gera ríki og sveitarfélög. Hratt er brugðist við og sama hvar ber niður það bitnar alltaf á fólki með einum eða öðrum hætti. Hinsvegar vantar stefnumótun til lengri tíma um hvernig við viljum sjá samfélagið við breyttar aðstæður. Ég tel að við slíka stefnumótun eigi að virkja sem flesta og ræða hvað er best að gera.

Ég sit sjálf í skólanefnd á Akureyri og þar var gripið til þess ráðs að virkja skólastjóra til að ákvarða hvar væri hægt að skera niður án þess að segja upp starfsmönnum. Þetta gerðu þeir síðan í samstarfi við sína starfsmenn og því ríkir sátt um þann þátt niðurskurðarins. En nú vitum við ekki hversu langt þrengingarnar ganga og þó fjárhagsáætlun ársins sé tilbúin er líklegt að hana þurfi að endurskoða síðar þó allir voni að svo sé ekki.

Því tel ég að allir stjórnmálaflokkar í landinu þurfi að vinna hörðum höndum að stefnumótun með breyttan fjárhag í huga í virku samstarfi við fólkið í landinu.

Formaður utan þings

Fróðlegt verður að sjá hvernig Sigmundi gengur að stýra stjórnmálaflokki af hliðarlínunni. Við næstu þingkosningar verður síðan spennandi að vita hvort Framsóknarflokkurinn lendir aftur í þeirri stöðu að formaðurinn verði ekki kosinn á þing. Sigmundar bíður því erfitt og flókið verkefni, sýna fram á að hann höndli hið nýja hlutverk og knýja fram kosningar eða komast í meirihluta á þingi og verða utanþingsráðherra. E.t.v. hugnast Sjálfstæðisflokknum að skipta um samstarfsflokk.

Sigmundur kjörinn formaður

Markmið Samfylkingarinnar

Þó svo að sumir telji Sjálfstæðisflokkinn miðdepil heimsins þá var Samfylkingin ekki stofnuð með það að markmiði að ýta þeim flokki til hliðar heldur til að vinna að ákveðnum pólitískum markmiðum. Þetta veit Björn Bjarnason mætavel en hann hefur gaman af því að skjóta á samherja sem andstæðinga og bara gaman að því.

Þeir sem hafa fylgst með umræðu Samfylkingarinnar um Evrópusambandið vita mætavel að sú umræða hófst ekki hjá okkur í fjármálakrísunni. Það gerðist hinsvegar hjá Sjálfstæðisflokknum, þar blasti skipbrot "frelsis" sem reyndist leiða til hömlulausrar græðgi. Skipbrot frelsis án aðhalds og eftirlits er algert.

Mikilvægast er að ræða Evrópusambandsaðild efnislega án þess að vera sífellt að hnýta í aðra. Sjálfstæðismönnum veitir ekki af allri sinni orku og tíma í að skoða málið hratt núna þar sem þeir hafa slugsað við heimavinnuna sína í þessum efnum undanfarin ár.

Ræði Sjálfstæðisflokkurinn einungis Evrópusambandið á landsfundi sínum væri hann ekki að bregðast sagnfræði sinni eða sögulegu hlutverki. Hann væri einfaldlega algerlega að bregðast flokksmönnum sínum þar sem það er alvarleg fjármálakreppa á Íslandi ef mönnum er það ekki ljóst. Það er því full ástæða fyrir flokkinn að ræða ástæður hennar og viðbrögð við henni á sínum landsfundi.

„Brygðist sögulegu hlutverki sínu“