Uppgjöf

Það er erfitt að sjá unga og efnilega stjórnmálakonu gefast upp við sitt fyrsta pólitíska mótlæti. Ósamræmi í gögnum vegna bygginga í götu föður hennar telur hún nóg til að hlaupa frá ábyrgðarstöðu í félagsmálum Akureyrarbæjar. Síst ætla ég að draga úr því að það sé óþægilegt að hæð bygginga við götu sé ekki á hreinu enda þurfa menn að ganga vel frá slíkum gögnum. Þessi tæpi metri sem munar á þakskeggi þess húss sem er hærra og því við hliðina á getur þó ekki verið nægilegur ásteitingarsteinn til að hverfa frá því verki sem menn buðu sig fram til við síðustu kosningar.

Vonandi ná Sjálfstæðismenn að þjappa saman liði sínu því mörg eru verkin í bænum sem þarf að vinna og óþægilegt ef ríkir upplausn hjá samstarfsflokki okkar Samfylkingarmanna í bænum. Nýr bæjarstjóri þarf greinilega að þjappa sínu liði saman og brýna það til verka.

Varabæjarfulltrúi hættir í Sjálfstæðisflokknum

Gróska í glæpasögum

Það er sérstaklega ánægjulegt að sjá að hægt er að veita sérstök verðlaun fyrir glæpasögur á Íslandi. Lengi vel komu hreinlega ekki út sögur af þessu tagi og því ekki hægt að veita nokkur verðlaun. Þetta er breytt og hver glæpahöfundurinn af öðrum stígur fram á sjónarsviðið og það sem ekki skiptir minna máli, fólk kaupir þessar bækur og les þær.

Flestir tala um Arnald Indriðason í þessu samhengi og fyrstu bækurnar hans voru virkilega góðar. Ég er mjög hrifin af Árna Þórarinssyni og sögunum hans núna en ég á eftir að lesa Stefán Mána svo nú er nauðsynlegt að lesa Skipið til að átta sig á hvort dómnefndin hefur svipaðan smekk á skáldsögum og ég.

 

Stefán Máni hlaut Blóðdropann

Dauf keppni

Ég var nokkuð spennt að sjá Formúluna í dag eftir að menn kölluðu belgísku brautina eina mest spennandi braut keppninnar. Þar væri hægt að taka framúr og því mætti búast við sviptingum í keppninni. Það var ekki og eins hefði verið hægt að hætta keppni eftir fyrstu þrjá hringina eins og sitja yfir kappakstrinum öllum. Vonandi tekst mönnum að gera bílana jafnari fyrir næsta mót þannig að eitthvað gerist í keppnum eftir fyrstu þrjá hringina hjá efstu mönnum. Nú er það eina sem getur breytt gangi mála ef eitthvað bilar.

Ágætir lýsendur RÚV gátu varla fundið nokkuð spennandi að segja en þeim var vorkunn, það gerðist lítið;-)

Öruggur sigur hjá Räikkönen og yfirburðir Ferrari miklir

Margfeldismynd - Photomontage

Gaman að sjá Morgunblaðið birta margfeldismynd eða s.k. photomontage með frétt hjá sér. Sumir eru þeirrar skoðunar að fréttamyndir skuli undantekningarlaust birta "hárréttar" ljósmyndir þ.e. einungis af því sem sannarlega er tekið í einum lýsingartíma myndavélar.

Ég er hinsvegar þeirrar skoðunar að menn eigi að geta unnið myndirnar sínar eða skapað úr þeim verk ef þeir svo kjósa. Hinsvegar er stíginn milli þessa tveggja stundum erfitt að feta. Við vitum öll að peningar eru ekki svona stórir miðað við foss sem og að risapeningar fljóta ekki niður eftir vatnsföllum. Öllum er því ljóst að hér er um margfeldismynd að ræða í þessu tilfelli.

Annars er spurning hvort það sé ekki nauðsynlegt fyrir fréttamiðil að geta þess sérstaklega um hvers konar mynd er að ræða og hver tekur hana sem og  hver vinnur lokaverkið?

Tekjur af erlendum ferðamönnum aukast til muna

Rosalegur jarðskjálfti við Súmötru

Var að sjá að jarðskjálfti sem fyrstu mælingar sýna upp á 7,9 á Richter var að ríða yfir við Súmötru. Þetta er rosalega stór skjálfti á þessu eyjasvæði og vonandi að hann sé þess eðlis að honum fylgi ekki flóðbylgjur.

Hér er staðsetningin á honum:

120 km SW Bengkulu (pop 309712, local time 18:10)
167 km SW Curup (pop 46245, local time 18:10)
799 km NW The settlement (pop 934, local time 18:10)

Stóri bróðir alls staðar?

Ég velti fyrir mér hvort nú sé svo komið í sögu að fylgst er með meira og minna öllum allsstaðar með farsímum og myndavélunum í þeim. Hvar sem er, hvenær sem er getur verið tekin af þér mynd eða upptaka af því sem þú segir. Sumir gætu gert þetta í þeim tilgangi að eiga samræður í jákvæðum eða neikvæðum tilgangi. Myndir til að skrásetja minningar eða niðurlægja. Þessi frétt er eins og njósnasaga með fullt af litlum njósnurum um kennarann sinn og samnemendur.

Þó svo að hér séu nemendur, hver veit hvort samstarfsmennirnir taki myndir af því hverja þú hittir, hvað þú ert að gera og jafnvel af verkefnunum sem þú ert að vinna. Einhverjir gætu freistast til að nýta slíkt til að komast til betri metorða í fyrirtæki, selja leyndarmál til annarra fyrirtækja o.s.frv. Á tímum sem okkar þar sem peningar eru í miðdepli gæti farsími einmitt verið hagkvæmur til að ná markmiðum sínum.

Er Orvells 1984 komið með fullt af leynisveitamönnum með öfluga farsíma í hendinni?

Nú  er spurning hvort það þarf að koma upp hirslum á veggjum skólastofu þar sem nemendur læri að setja símann í hirsluna í upphafi kennslustundar og ná síðan í hann aftur í lok kennslustundarinnar. Síðan er auðvitað hægt að virkja símann í náminu, taka myndir af því sem verið er að læra og sýna heima eða setja á Netið.

Það er eins með þessa tækni og aðra sumir kunna að fara með hana en aðrir ekki.

Taka þarf farsíma af nemendum

Röggsöm Jóhanna

Það er mikið lán að fá jafn dugmikinn og vinnusaman ráðherra sem Jóhönnu Sigurðardóttur. Mál sem hafa dankað í ráðuneytinu. Auðvitað tekur tíma að komast í gegnum allt sem þarf að gera en ég veit að það tekst Jóhönnu framar nokkrum öðrum.

Mikilvægt er að hafa í huga að fólk er fólk hvar sem það er fætt og það er mikilvægt fyrir íslenskt samfélag að hér verði ekki til leynilegt neðanjarðarsamfélag þar sem níðst er á fólki. Einnig grefur það undan fyrirtækjum sem vilja fara að íslenskum lögum og bera virðingu fyrir vinnandi fólki.

Ákveðið að hefja herferð gegn ólöglegri starfsemi fyrirtækja

Óhugnanlegt fyrirbæri

Mér þykir busun ævinlega frekar óhugnanlegt fyrirbæri þar sem það er tiltölulega algengt að eldri nemendur missi stjórn á sér við þennan atburð. Ég hef setið með stúlkum sem urðu fyrir því að eldri piltar káfuðu á þeim í látunum, nemendur látnir éta alskyns ógeð og annað þvíumlíkt. Nemendur eru látnir skríða, hellt er yfir þá óþverra og lætin yfirgengileg. Misjafnt er hvort eldri nemendur yfirhöfuð ráða við atburðarásina þegar hún er komin í gang.

Þegar ég kenndi í Fjölbrautaskólanum við Ármúla var busun hinsvegar til fyrirmyndar. Tekið á móti nýnemendum með rósum og síðan á busunardaginn sjálfan farið í ferðalag og eitthvað skemmtilegt gert grillað og fleira.

Ég held að það væri meira til sóma að taka vel á móti nemendum þar sem busunin reynist mörgum þeirra æði þungur baggi að bera og hefur jafnvel flæmt nemendur úr skóla eða dregið úr þeim kraft við námið og félagslífið.

Skólameistari MÍ segir busun hafa farið úr böndunum