Margfeldismynd - Photomontage

Gaman að sjá Morgunblaðið birta margfeldismynd eða s.k. photomontage með frétt hjá sér. Sumir eru þeirrar skoðunar að fréttamyndir skuli undantekningarlaust birta "hárréttar" ljósmyndir þ.e. einungis af því sem sannarlega er tekið í einum lýsingartíma myndavélar.

Ég er hinsvegar þeirrar skoðunar að menn eigi að geta unnið myndirnar sínar eða skapað úr þeim verk ef þeir svo kjósa. Hinsvegar er stíginn milli þessa tveggja stundum erfitt að feta. Við vitum öll að peningar eru ekki svona stórir miðað við foss sem og að risapeningar fljóta ekki niður eftir vatnsföllum. Öllum er því ljóst að hér er um margfeldismynd að ræða í þessu tilfelli.

Annars er spurning hvort það sé ekki nauðsynlegt fyrir fréttamiðil að geta þess sérstaklega um hvers konar mynd er að ræða og hver tekur hana sem og  hver vinnur lokaverkið?

Tekjur af erlendum ferðamönnum aukast til muna

Athugasemdir

[Vilborg Traustadóttir, 13.9.2007 kl. 14:21]

Já dáldið flott mynd. Og alltaf gaman að sjá nýjungar.Sammála að það þarf þó að gæta hófs.

[Jón Halldór Guðmundsson, 16.9.2007 kl. 12:53]

Mér finnst þetta viðeigandi mynd með fréttinni og ég held að þessi mynd blekki ekki lesandann.

[Lára Stefánsdóttir, 16.9.2007 kl. 14:06]

Alveg sammála þér Jón Halldór, en umræðan um fréttamyndir er nokkuð ströng og ég velti þessu meira fyrir mér en áður vegna námsins í heimilda- og fréttaljósmyndun í Academy of Art University þar sem ég stunda mastersnám. Ég hef mjög gaman af margfeldismyndum en reglurnar í kringum fréttamyndir eru býsna ósveigjanlegar svo jafnvel smáatriði sem eru tekin út og skipta engu máli fyrir myndina geta kostað menn vinnuna. Þessi mynd er ágætt dæmi um augljósa myndvinnslu en stundum er hún ekki augljós. Hér er ágætis grein um hvaða atriði geta komið upp.

Það hafa ekki allir sömu skoðun á málinu en mjög áhugavert að velta því fyrir sér. Í því samhengi er áhugavert að skoða ljósmyndir Morgunblaðsins sem birtast með fréttum. Ljósmyndin túlkar fréttina eins og fréttamaðurinn og kemur jafnvel eigin skoðun eða býr til skoðun á fréttinni eftir tilmælum eða öðru.