Leita í fréttum mbl.is

Bloggfærslur mánaðarins, janúar 2007

Til hamingju!

Flott hugmynd af afmæli hjá Árna og alveg í hans anda. Hitti hann nokkrum sinnum þegar við vorum á upphafsdögum Íslenska menntanetsins og menn að reyna að ná áttum í hvað Internetið er. Þegar aðrir horfðu á mann háðulega þá var Árni leitandi og velti þessum málum fyrir sér og sá ýmsa skemmtilega fleti. Alltaf gaman að tala við hann.

Þeir hefðu mátt taka Árna sér til fyrirmyndar yfirstéttarstjórnendur Pósts og Síma á þessum tíma sem ég reyndi að fá að vinna fyrir í staðinn fyrir að vera að leggja mestan tíma í Telia (sænska símann). Hitti þá á sýningu í Genf 1995 þar sem þeir stóðu í fínu jakkafötunum sínum og hringluðu koníaki í glasi, horfðu rosalega langt niður á mig og einn sagði "Það verður aldrei neitt úr þessu Interneti væna mín". Og snéri síðan í mig bakhlutanum og sötraði konjakið. Aldrei hefur mig langað eins til að eiga myndskeið úr lífi mínu eins mikið og af þessu atriði. Óborganlegt og klár lýsing á því hugarfari sem tröllreið þeirri fornaldarstofnun.

En ekki vissi ég að Árni væri jafn gamall mér, hélt hann væri yngri;-)

Ef einhver les þetta og hittir Árna blessuð sendið honum mínar bestu afmæliskveðjur!


mbl.is Sautján hljómsveitir í fimmtugsafmæli Árna Matthíassonar
Tilkynna um óviðeigandi tengingu við frétt

Sofandi á verðinum

Svo virðist sem við séum sofandi á verðinum gagnvart loftmengun því það er vart ásættanlegt að íbúar í bæjum sem skilgreina mætti sem "smábæi" á alþjóðavísu eins og Reykjavík er að þar þurfi einhverjir íbúar að búa við mengun sem er sambærileg við mengun stórborga. Segja má að í umhverfismálum höfum við Íslendingar verið dálítið valkvæmir þar sem við erum dugleg að gagnrýna t.d. framkvæmdir á ósnertri náttúru á ákveðnum stöðum en ekki öðrum. Við erum ekki jafn dugmikil þegar kemur að loftmengun, ljósmengun og ýmsum öðrum umhverfisspjöllum og er óskandi að vitund manna (mín líka) aukist verulega á þessu sviði.

Ég hef heimsótt Hrísey nokkrum sinnum en þar er samfélag sem er líklega einna best meðvitað um umhverfismál í landinu. Flokkun úrgangs er óvíða meiri og umgengni til fyrirmyndar. Þar eru margir sem hafa áhuga á að í eynni verði ekki bílar heldur einungis flutningstæki þegar flytja þarf farm eða þyngri hluti. Ég minntist þá bæjarins Zermatt í Sviss með 5.500 íbúum þar sem engir bílar eru leyfðir utan rafmagnsbíla en þetta er einmitt bærinn þar sem má sjá Matterhorn blasa við. Kyrrðin er einstök og umhverfið ægifagurt.

Við getum ekki verið "eins máls fólk" þegar kemur að umhverfismálum.


mbl.is Þúsundir búa við svipaða mengun hér og íbúar evrópskra stórborga
Tilkynna um óviðeigandi tengingu við frétt

Lifum áfram en skiljum afturábak

Var það ekki Søren Kirkegård sem sagði að við þyrftum að lifa lífinu áfram en skilja það afturábak? Mér datt þetta í hug þegar ég las frétt af Hilary Clinton sem telur Bush hafa misnotað atkvæði demókrata sem studdu hervald í Írak. Þrátt fyrir að alþjóðleg skoðunarsveit fullvissaði SÞ um að ekki væru gjöreyðingarvopn í Írak voru menn í Bandaríkjunum vissir, svo vissir að þeir hafa nú háð þar stríð í fjögur ár.

Ekki ætla ég að verja stjórnsýslu Saddam Hussein en það er ábyrgðarhluti að kollvarpa stjórnsýslukerfi í heilu landi á örskotsstundu. Það er ekki svo auðvelt að byggja það upp aftur. Það hefur komið á daginn í Írak og við þekkjum þetta víðar að. Þess vegna er það svo mikilvægt að þegnar hvers lands standi dyggan vörð um lýðræðið og beri virðingu fyrir því. Þegar of langt er gengið þá brestur eitthvað og það er það sem Írak er að fást við.

Eins og staðan er núna í Írak er hinsvegar ekki auðveld í Al Jazeera má lesa um tugi þúsunda Bandaríkjamanna mótmæla stríðinu og krefjast þess að menn haldi heim nú þegar. En geta menn það? Er hægt að ráðast inn í land og hlaupa svo heim frá hlutunum í mikilli óreiðu? Hvað segir sagan frá Vietnam? Hinsvegar er ljóst af fréttum í Al Jazeera að íbúar Arabalandanna trúa því ekki að utanríkisstefna Bandaríkjanna muni breytast mikið þó Demókratar taki við völdum sbr. þessi frétt.


mbl.is Clinton segir Bush hafa misnotað vald sitt
Tilkynna um óviðeigandi tengingu við frétt

Snilld

Mikið vildi ég að þetta hefði verið komið þegar ég var að þvælast 15-17 sinnum til útlanda á ári. Mikið sem maður var orðinn hundleiður í flugferðum milli landa. Ekki svo að skilja að ég gæti ekki verið að vinna, lesa, sofa og allt mögulegt en hinsvegar er þetta rými sem maður hefur ákaflega þröngt, tja nema þegar flogið var á Saga class þá var plássið fínt. Önnur súperþjónusta þar var hinsvegar gagnslaus að mínu mati, ef maður sullaði í sig rauðvíni var maður þreyttur og illa fyrirkallaður á áfangastað og súkkulaði hafði alveg sömu áhrif. Nóg af vatni, standa upp og hreyfa sig, fitusnauðan mat, sofa vel á leiðinni og maður var ferskur og fínn á áfangastað nema þegar flugin voru mjög löng. Ég hef verið 16 tíma í einni og sömu flugvélinni í einu, þá hefði nú verið fínt að hafa svona græjur;-)
mbl.is Allir farþegar fá sinn eigin skjá
Tilkynna um óviðeigandi tengingu við frétt

Glæsilegt kvöld

Góð tilbreyting frá keppni í alskyns boltaleikjum að horfa á keppni í lagasmíðum. Söngvarakeppnir eru líka skemmtilegar en mér finnst Eurovision keppnin hér heima frábær. Alskyns tónlist er dregin fram, útsett og kláruð og við höfum eignast margar perlurnar í þessari keppni. Kvöldið var frábært og niðurstaðan bara fín, auðvitað fleiri fín lög, ég hefði viljað sjá fyrsta lagið áfram hjá Sauðkrækingunum þeir voru flottir.


mbl.is Tveir Eurovisionfarar í úrslit
Tilkynna um óviðeigandi tengingu við frétt

Nú er eitthvað að gerast

Aðföng bænda hafa allt of lítið verið í umræðunni þegar kemur að matarverði en hér eru menn greinilega að taka til hendinni. Fá garðyrkjubændur raforku á sama verði og álverin? Hvað með lyf sem þarf handa dýrunum? Fóðrið er einungis einn þáttur en ég er viss um að það má ná niður matarverði á íslenskum landbúnaðarvörum töluvert með því að ná niður kostnaði við framleiðsluna.

Aðalsíða Láru


mbl.is Ætlar að bjóða 10–20% lægra verð á kjarnfóðri
Tilkynna um óviðeigandi tengingu við frétt

Höfundur

Lára Stefánsdóttir
Lára Stefánsdóttir

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband