Í hvað verður orkan notuð?

Það var löngu komið á hreint að úrskurður Þórunnar hindraði í engu framkvæmdir á Þeistareykjum. Ég velti hinsvegar fyrir mér hvað gerist ef það kemur annar orkukaupandi sem vill nýta orkuna á svæðinu í eitthvað allt annað. Mér vitanlega hefur Alcoa ekki einkaleyfi á þessari orku og því gætu Þeistareykir ehf og Landsvirkjun ákveðið að halda áfram séu líkur til þess að hægt sé að selja orkuna.

Þá er spurning hvort þeir fjölmörgu sem hafa bent á nauðsyn þess að nýta orkulindir landsins í annað en álver geti nýtt þessa seinkun til að byggja eitthvað annað upp. Þá er spurning hvað það gæti verið og hver getur staðið fyrir því.

Fresta rannsóknarborunum að Þeistareykjum

Athugasemdir

[Skákfélagið Goðinn, 31.10.2008 kl. 23:37]

VG. veit svarið við því

[Lára Stefánsdóttir, 1.11.2008 kl. 00:02]

Jú ég tel það víst, en verður það eitthvað annað en orðræða? Þar er talað svo mikið að menn hafa líklega sagt allt um allt og geta því alltaf sagst hafa sagt allt. Oft var þörf en nú er nauðsyn, á að þeir sem hafa bent á aðrar leiðir framkvæmi þær.

[Soffía (IP-tala skráð) 1.11.2008 kl. 00:28]

Það er von að þú spyrjir, sem hefur ekki hugmynd um hvaðan peningar koma til okkar þjóðfélags. Heldur að peningar detti af himni ofan. Vona bara að þú sjáir þig í framtíðinni á Íslandi.

[Sigurjón Benediktsson (IP-tala skráð) 1.11.2008 kl. 06:43]

Hvaða orka? Úrskurður umhverfisráðerra var kveðinn upp 4.5 mánuðum eftir að ákvörðun Skipulagsins var kærð. Síðan tók það umhverfisráðuneytið 2,5 mánuði að útskýra sinn eigin úrskurð

Umhverfisráðherra ber alfarið ábyrgð á þessari töf enda var margbent á afleiðingar gjörða hennar. Gott að vita að þú sért komin í "eitthvað annað" hópinn. Þið getið þá saman fagnað þessu áfalli eigenda Þeistareykja (sveitarfélög og LV) og sjálfsagt reynið þið að knésetja sveitarfélögin austan Akueyrar endanlega til að þóknast umhverfisráðherranum ykkar.

Samningur Norðurþings, Alcoa og ríkisins er enn í fullu gildi svo þú skalt spara þér að grafa upp "eitthvað annað". Er eitthvað mikið að hjá ykkur?

[Vilborg Traustadóttir, 1.11.2008 kl. 12:41]

Hægan Soffís, ég veit ekki betur en VG hafi fyrirfram útilokað sig frá stjórnarmyndun með yfirlýsingum út og suður, kannski því miður? Úr þessu verður erfitt að fá úr því skorið.

Það er alveg satt að nú er tími framkvæmda kominn.

[Vilborg Traustadóttir, 1.11.2008 kl. 12:42]

Soffía átti þetta að vera, bið forláts:

[Hagbarður, 1.11.2008 kl. 12:49]

Ég verð bara að taka ofan hattinn fyrir ykkur stjórnmálamönnum varðandi umræður um umhverfismat o.fl. Þið eruð glámskyggnari en ég hélt. Hvernig í ósköpunum er hægt að komast fyrirfram að því að umhverfismat og sú vinna sem þar fer fram geti ekki haft einhver áhrif á framkvæmdina til breytinga eða til tafa? Afhverju er þá verið að eyða peningum í umhverfismat?

[Lára Stefánsdóttir, 1.11.2008 kl. 16:00]

Umhverfismat fer fram við allar framkvæmdir og í upphafi var gert ráð fyrir þeim varðandi orkumál á Þeistareykjum sem og öðrum þeim staða sem tengjast hugmyndum um álver á Bakka. Úrskurður umhverfisráðherra fjallaði um að skoða saman fjórar skýrslur og sjá sameiginleg heildaráhrif. Í upphafi leit út fyrir að það setti í uppnám rannsóknarboranir á Þeistareykjum næsta sumar en það voru einu framkvæmdirnar á tímabilinu sem þessi úrskurður hefði getað haft veruleg áhrif á enda einungis hægt að bora þar að sumarlagi miðað við núverandi vegalagnir á svæðið. Úr þessu var skorið og rannsóknarboranir gátu farið fram næsta sumar og því hefði sameiginlegt umhverfismat ekki tafið framkvæmdir eins og áætlað var. Hitt byggist síðan á samstarfi þeirra aðila sem hafa með þá fjóra þætti að gera sem átti að kanna saman.

Það er síðan pólitísk leikfimi ef menn vilja að umhverfisráðherra beri ábyrgð á því hvað álversfyrirtæki ákveður að gera í núverandi efnahagsumhverfi í heiminum. Ég held að þar sé fyrirtækið einfaldlega að hugsa um rekstur sinn.