Barnabróðir og systkynamóðir

Mér hefur ekki þótt góð íslenska í kringum það fjölskyldumynstur sem er hér á landi þar sem fólk skilur, giftist aftur, eignast börn og fjölskyldan því samansett á annan hátt en móðurmálið gerir ráð fyrir. Því tel ég að íslenskan hafi stirnað í fjölskyldumálum og hér þurfi að taka til hendinni.

Börnin mín eiga systkini sem ég á ekki og því finnst mér rétt að þau sem eru systir og bróðir barnanna minna séu þar af leiðandi barnasystir mín og barnabróðir minn. Þá hef ég alveg nýtt hlutverk og er systkinamóðir þeirra.

Mér þykir þetta frábær íslenska og mjög þjál. Þar af leiðandi getur maður skilgreint fjölskylduna betur og hvernig hún er tengd manni. þar sem barnasystir mín og barnabróðir minn eiga ekki sömu móður þá geta þau kallað hvort annað systkinabróður og systkynasystur. Mjög fínt að segja líka þetta er bróðursystir mín eða systurbróðir minn.

Verður dálítið flókið í upphafi að venja sig á þetta en ef ég get átt föðursystur hlýt ég að geta átt barnasystur;-)

Athugasemdir

[Tryggvi R. Jónsson (IP-tala skráð) 14.3.2008 kl. 22:41]

Tja, ég á systkini sem eiga öll systkini sem eru ekki systkini mín þannig að ég er þá í raun systurbróðir og bróðurbróðir sem jú hljómar bara ágætlega og er mjög lýsandi.

[Gísli Baldvinsson (IP-tala skráð) 14.3.2008 kl. 23:06]

Farðu á Dubbel Dusch eftir Björn Hlyn frænda. Það er skemmtun..flókin!

[Fífa sys (IP-tala skráð) 15.3.2008 kl. 12:09]

Þetta leysir mörg vandamál, þakka þér fyrir sys. Ég á barnasystkini. Þetta leysir talsvert fyrir dóttur mína sem er hætt að útskýra systkinamóðurbróður sinn og segir hann bara frænda sinn.